Canada ram Kitchener khua Chin miphun kan phak hi 2003 kum a si. A phan hmasa hna hi nuva khuah 6 an si . An dihlak Malysia lei in ralzam dirhmun in a phanmi an si hna . 2004 November 14 tiang ah Kitchener ah Laimi an dihlak ngakchia telh in minung 12 an si. Chin miphun cu khrihfa kan si bang hi minung 12 nih 2024 November 14 ni ah Kitchener Chin Christian Fellowship (KCCF) tiah min an rak pek. Fellowship hruaitu caah upa minung 8 (ruahnak petu minung 3 telh in) rian an rak khinh hna. Nain, mitlawm tuk an rak si rih caah Nu Bu, Mino le Sunday school department a um rih lo.Upa tuanvo khinh hna nih zarh fatin caan thiah le pumhnak fang lawng tuanvo lak in kal pi a rak si. Mumal in a function kho rih lo.

 

2004 – 2005 tiang hi KCCF cu phunghram le bylaw ngei loin a rak um. Cucaah a min lawng a rak si rih i, Bu tungtlang le muisam a ngei rih lo. KCCF a dir thawkin 2005 kum October a dongh zarh tiang hi inn khat hnu innkhat ṭhial in zarhpini ah pumhnak ngeih a rak si.

 

Caan ruahlo ah Canada khuasa Chinmi hmun dangdang um cia nih siseh, India le Malaysia lei in hung fuh ziahmah a si. 2005 kum a donghlei tiang ah Kitchener khua ah Chinmi minung a let in karh a si.

 

Fellowship hruaitu dingah khrihfa upa cu November 25, 2005 ni ah mipi nih rak thim an si. 2006 thawkka ṭhiam ah Nu Bu upa le Mino hruaitu zong mipi nih thim an rak si fawn. Mumalte le fekfuan deuh in kan kal khawh nakhnga tiah Khirhfa upa nih Iṭhithruainak phunghram le bylaw ahran a ser colh i, mipi sinah voi 2 tiang chuahpi a si. March 18, 2006 ni zanlei suimilam 7: 00 bakbak ah mipi meeting a kai kho minung 19 nih Pathian sin thlacamnak in fehter le cohlan a si. Cu ni thawk in KCCF cu tungtlang ngei le muisam ngei ah a hung cang.

 

Caan a hung kal i 2006 dongh lei ah Fellowship cu Church ah thlen ding fellowship hruainak nawl ngeihnak sang bik General meeting ah chuahpi a rak si. 2007 khrihfa upa nih tawlrel in, mipi meeting kan au hna sehlaw, cu ahcun ceih nolh siseh tiah GM nih bia a fun. April 27,2007 ni ah GM biafun cia bang mipi meeting ah chuahpi ṭhan a si. Bia a tlu kho lo. Meeting a kai mizapi nih hi kong hi biapi tukmi a si caah, hmin tein kan ceih a ṭha. Cucaah next meeting ah ceih ṭhan siseh tiah biafunnak a tuah nolh ṭhan. Cu biachahnak bang mipi meeting cu November 24,2008 ah tuah a si. Mitam deuh duhnak in fellowship cu Church ah thlen a si. A min kongah mipi lei in biachimnak pek hmasa an si lengah an duhmi min zong i thawhnak caan pek an si. Mipi chungin a rami min 3 hna cu secret ballot in vote pek a si. Chin Baptist Church nih mee tam bik a hmuh.Cu ni thawk cun Fellowship cu Chin Baptist church ah thlen a si. Cu ticun Kitchener Chin Baptist Church hram aa sihning le aa thawkning cu a si. Pathian nih a liam cia caan ah lam a kan hruai, a kan kilven, a kan umpi. Hmailei kar kan hlan lainak zong kan biak Pathian thawng lawnglawng a si.Pathian lawnglawng hi kan zeizong a si.